فكرت في أحسن طريقة لصياغة البوست ده
لكن ملقيتش أحسن من طريقة السؤال والجواب. جمعت هنا أغلب الأسئلة عني ولو سؤالك
مكنش موجود تقدر تسأله من رابط التواصل هنا
1. عرفنا بنفسك.
أنا أحمد محمد طه مصطفى محمد،
شاب مصري من الجيزة من البدرشين. أنا من عيلة السقعان. مواليد 2001، تاريخ ميلادي
بالظبط هو 11/9/2001 ( أيوة هو يوم إنفجار برجين التجارة في أمريكا لأ والكبيرة
إنه في نفس الوقت كمان ). أما ديني الإسلام والحمد لله.
2. ايه قصة الموقع ده معاك؟
زي ما تقول كنت قاعد فاضي فقولت لما
أأرخ ( أيوة أأرخ ) الأحداث الي حصلت في حياتي ( أأرخ يعني أحطلها التاريخ الي
حصلت فيه ) وطبعا عملتها بالفلاش باك علشان كدا توصل دقة التواريخ في الموقع لـ
98% 99% حاجة في الرينج ده، لكن مش أقل من كدا.
3. ايه هواياتك؟
بحب قراية الروايات الي بتعجبني،
وأشوف أفلام الأنيميشن الي بتعجبني، وأشوف الأفلام الي بتعجبني، وألعب الألعاب
الإلكترونية إلي بتعجبني، وبحب جدًا الـ Board Games وألعاب الورق كمان ( يا عم ده انا مألف لعبة
كوتشينة اسمها كارتلد ).
4. أمنيتك ايه؟
أمنيتي إن الأسئلة دي تخلص. لأ نتكلم
جد شوية، أمنيتي إني أستمتع بكل لحظة في حياتي وأبقى الشخص المثالي إلي بحلم بيه.
بس دي مش امنية ( ما انت لو مذاكر عربي بس ) دي رجاء، علشان الرجاء ممكن يحصل لكن
الأمنية لأ، وأنا الحمد لله حققت شوية من "الأمنية".
5. قولنا حاجاتك المفضة اليومية.
اللون: الأزرق والأسود والكحلي.
الأكل: البيتزا والشاورما والبرجر
والباقي برضو ( طول ما الحاجة طعمها حلو أنا دايس ).
الرقم: رقم 1 ده رقم أول حرف من اسمي
في الانجليزي والعربي وكمان بحب أكون رقم واحد دايمًا وكمان أنا حر أختار الرقم
الي انا عاوزه.
6. احكيلنا عن تايم لاين دراستك.
درست الروضة في مدرسة الكويت
الأهلية، وبعدين الباقي كان مدرسة النجاة الأهلية للبنين، والجامعة في جامعة الكويت وكل دراستي في المدرسة والروضة والجمعة كانت في الكويت.
7. ايه شعارك في الحياة؟
مفيش حد صالح كله بتاع مصالح. لأ
بهزر طبعًا، أصل انا عندي كتير وهديلك واحدة منهم وهي "كل إنسان جاي الحياة
عنده رسالة ولازم يقدمها"
8. قولنا عن طموحك في الحياة.
بفكر أفتح شركة للعمل الحر.
9. وضعك الاجتماعي ايه؟
سنجل إلى أبد الآبدين ( خد رقمي +965 55971411 ).
